గ్లామర్ ప్రపంచంలో దశాబ్ద కాలం పాటు హీరోయిన్గా నిలదొక్కుకోవడం అంటే సామాన్యమైన విషయం కాదు. ఏటా వందల మంది కొత్త భామలు వస్తున్నా, తనకంటూ ఒక ప్రత్యేకమైన బ్రాండ్ క్రియేట్ చేసుకున్న నటి తమన్నా భాటియా. నేడు(డిసెంబర్ 21) ఆమె పుట్టినరోజు సందర్భంగా, ఒక సాధారణ ముంబై అమ్మాయి దక్షిణాది సినీపరిశ్రమలో స్టార్ హీరోయిన్గా ఎలా ఎదిగిందో తెలుసుకుందాం.
ముంబై టు హైదరాబాద్..
తమన్నా 1989, డిసెంబర్ 21న ముంబైలో ఒక సింధీ కుటుంబంలో జన్మించింది. ఆమె తండ్రి సంతోష్ భాటియా డైమండ్ మర్చంట్. అయితే తమన్నాకు చిన్నప్పటి నుంచే కళల పట్ల ఆసక్తి ఉండేది. కేవలం 13 ఏళ్ల వయసులోనే పృథ్వీ థియేటర్లో నటనలో శిక్షణ పొందింది. ఆ పట్టుదలే ఆమెను 15 ఏళ్లకే ‘చాంద్ సా రోషన్ చెహ్రా’ సినిమాతో హీరోయిన్గా మార్చింది. ఆ తర్వాత ‘శ్రీ’ సినిమాతో టాలీవుడ్కు పరిచయమైనా, మొదట్లో ఆమెకు అంతగా గుర్తింపు రాలేదు. కానీ ఓటమిని అంగీకరించని నైజం ఆమెను ‘మిల్కీ బ్యూటీ’గా మార్చింది.
సంఖ్యాశాస్త్రంపై నమ్మకంతో పేరు మార్పు..
చాలా మందికి తెలియని విషయం ఏంటంటే, తమన్నా తన కెరీర్ ఆరంభంలో వరుస పరాజయాలను ఎదుర్కొంది. ఆ సమయంలోనే న్యూమరాలజీని నమ్మి తన పేరులోని అక్షరాలను మార్చుకుంది. ‘Tamanna’ కాస్త ‘Tamannaah’గా మారింది. ఆశ్చర్యకరంగా ఆ తర్వాతే ఆమెకు ‘హ్యాపీ డేస్’ వంటి భారీ హిట్ లభించింది. అప్పటి నుండి ఆమె వెనుదిరిగి చూసుకోలేదు.
Tamannaah1
తమన్నా తన వ్యక్తిగత విషయాలను చాలా గోప్యంగా ఉంచేది. కానీ గత ఏడాదిగా బాలీవుడ్ నటుడు విజయ్ వర్మతో ఆమె సీరియస్ రిలేషన్లో ఉన్నట్లు స్వయంగా ప్రకటించింది. “విజయ్ నా హ్యాపీ ప్లేస్” అని ఆమె చెప్పిన మాటలు నెట్టింట వైరల్ అయ్యాయి. కానీ ప్రస్తుతం వాళ్లిద్దరూ బ్రేకప్ చేసుకున్నట్లు టాక్. గతంలో ఒక క్రికెటర్తో లేదా బిజినెస్మెన్తో పెళ్లి అంటూ వచ్చిన రూమర్లన్నింటికీ ఆమె తన పనితోనే సమాధానం చెప్పింది. ఆమెకు వంట చేయడం కంటే తినడం ఇష్టమని, ముఖ్యంగా చాక్లెట్లు అంటే ప్రాణమని చెబుతుంటుంది.
కేవలం సినిమాలే కాదు, తమన్నా ఒక సక్సెస్ఫుల్ బిజినెస్ ఉమెన్ కూడా. ఆమెకు ‘వైట్ అండ్ గోల్డ్’ అనే జ్యువెలరీ బ్రాండ్ ఉంది. తన తండ్రి డైమండ్ బిజినెస్లో ఉన్న అనుభవంతో ఆమె ఈ వ్యాపారాన్ని కూడా విజయవంతంగా నడిపిస్తోంది. వెండితెరపైనే కాదు, రియల్ లైఫ్ లోనూ ఆమె ఒక ‘బాస్ లేడీ’ అని నిరూపించుకుంది. అబ్బాయిల కలల రాకుమారిగా తన ప్రస్థానాన్ని విజయవంతంగా కొనసాగిస్తున్న తమన్నా భాటియా.. భవిష్యత్తులో మరిన్ని విభిన్నమైన పాత్రలతో ప్రేక్షకుల్ని అలరించాలని కోరుకుంటూ.. హ్యాపీ బర్త్ డే మిల్కీ బ్యూటీ!
