పెళ్లిసందడి సినిమాతో తెలుగు ప్రేక్షకులను పలకరించింది అందాల తార శ్రీలీలా. తొలి సినిమాతోనే తనదైన అందం, అభినయంతో ప్రేక్షకులను మెస్మరైజ్ చేసిందీ చిన్నది. ముఖ్యంగా కుర్రకారు హృదయాలను కొల్లగొట్టిందీ చిన్నది. ఈ సినిమా విజయంతో శ్రీలీలాకు తెలుగులో వరుసగా ఆఫర్లు క్యూ కట్టాయి.
ధమాకా, స్కంద, ఆదికేశవర, ఎక్స్‌ట్రాఆర్డినరీ మ్యాన్‌, గుంటూరు కారం ఇలా అన్ని పెద్ద సినిమాల్లో నటించింది. అయితే ఈ బ్యూటీకి పెళ్లి సందడి తర్వాత మళ్లీ ఆ రేంజ్‌ పాత్ర పడలేదని చెప్పాలి. కాగా ప్రస్తుతం ఈ బ్యూటీ ఉస్తాద్‌ భగ్‌ సింగ్‌తో పాటు రాబిన్‌ హుడ్‌ అనే చిత్రంలో నటిస్తోంది. నితిన్ హీరోగా నటిస్తున్న రాబిన్‌ హుడ్‌ చిత్రంలో శ్రీలీలా వైవిధ్యమైన పాత్రలో నటించనున్నట్లు తెలుస్తోంది.
శుక్రవారం శ్రీలీలా పుట్టినరోజును పురస్కరించుకొని రాబిన్‌హుడ్ చిత్ర యూనిట్‌ ఈ సినిమాకు సంబంధించి టీజర్‌ను విడుదల చేశారు. ఇందులో ఈ బ్యూటీ నీరా వాసుదేవ్‌ అనే పాత్రలో నటిస్తోంది. కేవలం 43 సెకండ్ల నిడివితో ఉన్న ఈ టీజర్‌ ప్రేక్షకులను ఆకట్టుకుంటోంది. శ్రీలీలా చెప్పిన.. ‘‘జ్యోతీ… సునామీలో టి సైలెంట్‌ ఉండాలి… నా ముందు నువ్వు సైలెంట్‌గా ఉండాలి’ అనే డైలాగ్‌ ఈ సినిమా కామెడీ నేపథ్యంగా సాగేలా ఉందని చెబుతోంది.
ఇక ఈ చిత్రంలో నితిన్ హీరోగా నటిస్తోన్న విషయం తెలిఇసందే. 2023లో వచ్చిన ‘ఎక్స్‌ట్రాఆర్డినరీ మ్యాన్‌’ చిత్రం తర్వాత హీరో నితిన్, హీరోయిన్ శ్రీలీల రెండోసారి జోడీగా నటిస్తున్న చిత్రం ఇది. ఈ సినిమాకు వెంకీ కుడుముల దర్శకత్వం వహిస్తుండగా.. రాజేంద్ర ప్రసాద్, ‘వెన్నెల’ కిశోర్‌ కీలక పాత్రలు పోషిస్తున్నారు. మైత్రీ మూవీ మేకర్స్‌పై నవీన్‌ యెర్నేని, వై. రవిశంకర్‌ నిర్మిస్తున్నారు.
ఈ సినిమాను యాక్షన్‌, కామెడీ ఎంటర్‌టైనర్‌గా తెరకెక్కిస్తున్నారు. శ్రీలీలా ఇప్పటి వరకు నటించని పాత్రలో ఈ సినిమాలో నటించనున్నట్లు తెలుస్తోంది. ఇక ఈ చిత్రాన్ని క్రిస్మస్‌ కానుకగా డిసెంబర్‌ 20వ తేదీన విడుదల చేయడానికి చిత్ర యూనిట్‌ సన్నాహాలు చేస్తోంది. ఇదిలా ఉంటే ఈ సినిమాతో పాటు శ్రీలీలా రవితేజతో మరో సినిమాలో నటిస్తోంది.
మరిన్ని సినిమా వార్తల కోసం క్లిక్‌ చేయండి..
