పుష్ప2.. ఈ సినిమా కోసం బన్నీ అభిమానులతో పాటు, యావత్‌ ఇండియన్‌ సినిమా ఇండస్ట్రీ వేయి కళ్లతో ఎదురు చూస్తోంది. సుకుమార్ దర్శకత్వంలో అత్యధికంగా ప్రతిష్టాత్మకంగా భారీ బడ్జెట్‌తో ఈ సినిమా తెరకెక్కుతోన్న విషయం తెలిసిందే. పుష్ప చిత్రం దేశవ్యాప్తంగా ఎలాంటి సంచలనం సృష్టించిందో ప్రత్యేకంగా చెప్పాల్సిన పనిలేదు. అలాంటి హిట్‌ మూవీకి సీక్వెల్‌గా తెరకెక్కుతోన్న ఈ సినిమాపై భారీ అంచనాలు ఉన్నాయి.
ఎర్రచందనం సిండికేట్‌కు నాయకుడుగా మారిన తర్వాత పుష్పరాజ్‌ ఎలాంటి కష్టాలు ఎదుర్కొన్నాడు.? నేపథ్యంలో పుష్ప సీక్వెల్ తెరకెక్కుతోంది. ఇప్పటికే మెజారిటీ షూటింగ్ పూర్తి చేసుకున్న ఈ సినిమా చిత్రీకరణ ప్రస్తుతం హైదరాబాద్‌లోని ఫిలిం సిటీలో జరుపుకుంటోంది. గ్రామీణ నేపథ్యంలో సాగే కొన్ని సన్నివేశాలను సెట్‌లో నిర్వహిస్తున్నారు. వీటితో పాటు కొన్ని కీలక సన్నివేశాలను మేకర్స్‌ తెరకెక్కిస్తున్నారు. అల్లుఅర్జున్‌తో పాటు ఇతర పాత్రధారులపై ఈ సన్నివేశాల చిత్రీకరణ జరుగుతోంది.
ఇదిలా ఉంటే పుష్ప2 చిత్రాన్ని ఆగస్టు 15వ తేదీన విడుదల చేయడానికి చిత్ర యూనిట్ సన్నాహాలు చేస్తున్న విషయం తెలిసిందే. ఇప్పటికే మేకర్స్‌ దీనికి సంబంధించి అధికారిక ప్రకటన సైతం చేశారు. అయితే తాజాగా తెలుస్తోన్న సమచారం ప్రకారం పుష్ప2 సినిమా విడుదల వాయిదా పడనుందని తెలుస్తోంది. మరికొంత షూటింగ్ మిగిలిఉండడం, అలాగే ఎడిటింగ్ విషయంలో సుకుమార్ ఇంకాస్త జాగ్రత్త తీసుకుంటున్న తరుణంలో సినిమా విడుదల ఆలస్యం కానుందని అంటున్నారు.
సెప్టెంబర్‌ మొదటి వారం లేదా చివరి వారంలో పుష్ప2 సినిమా విడుదలయ్యే అవకాశాలు ఉన్నట్లు అంచనావేస్తున్నారు. కాగా పుష్ప 2 చిత్రంలో రష్మిక హీరోయిన్‌గా నటిస్తుండగా.. అనసూయ, సునిల్‌ కీలక పాత్రలో నటిస్తున్న విషయం తెలిసిందే. ఇప్పటికే ఈ సినిమా నుంచి విడుదలైన టీజర్‌తో పాటు పాటలు సినిమాపై ఒక్కసారిగా అంచనాలు పెంచేశాయి. పుష్ప చిత్రాన్ని మించి సీక్వెల్ విజయం సాధించడం ఖాయమని చిత్ర యూనిట్ ధీమాతో ఉంది.
మరిన్ని సినిమా వార్తల కోసం క్లిక్ చేయండి..
