టాలీవుడ్‌ సంచలనంగా మారిన డ్రగ్స్‌ కేసులో రోజుకో మలుపుతిరుగుతోంది. డ్రగ్స్‌ కేసులో అరెస్టయిన కబాలి తెలుగు నిర్మాత కృష్ణ ప్రసాద్‌ చౌదరి (కేపీ చౌదరి)తోపాటు పలువురు సెలబ్రెటీలకు పోలీసులు నోటీసులు పంపేందుకు ఏర్పాట్లు చేస్తున్నట్లు సమాచారం. ఈ లిస్టులో పలువురు సినీ సెలబ్రెటీలు, క్రీడాకారులు, వైద్యులు, వ్యాపారస్థులు కూడా ఉన్నారు. వీరందరికీ కొకైన్‌ సరఫరా చేసినట్టు పోలీసులు రిమాండ్‌ రిపోర్టులో పేర్కొన్నారు. దీంతో ఆయా వర్గాల్లో అలజడి మొదలైంది.
ఇందుకు సంబంధించిన లావాదేవీలు, డ్రగ్స్‌ కొన్నవారి లిస్టు, బ్యాంకు లావాదేవీలు, ఫోన్‌ సంభాషణలు, వాట్సాప్‌ చాటింగ్‌లు, డ్రగ్స్‌ పార్టీల ఫొటోలను నిందితుడు కేపీ చౌదరి తన గూగుల్‌ డ్రైవ్‌లో భద్రపరుచుకున్నాడు. పోలీసులు దర్యాప్తులో భాగంగా వాటన్నింటినీ వెలికితీశారు. నిజానిజాలను బయటపెట్టాలంటే సదరు సదరు సెలబ్రిటీలు, ఇతర వ్యక్తులను పూర్తి స్థాయిలో విచారించవల్సి ఉంటుంది. దీనిలో భాగంగా వారందరికీ నోటీసులు జారీ చేసి విచారించాలని పోలీసులు యోచిస్తున్నారు.
కాగా జూన్‌ 14న కబాలీ నిర్మాత కేపీ చౌదరి గోవా నుంచి హైదరాబాద్‌కు 100 గ్రాముల కొకైన్‌ తీసుకువచ్చాడు. అందులో 12 గ్రాముల కొకైన్‌ను విక్రయించినట్లు కేపీ చౌదరి పోలీసులకు తెలిపాడు. ఐతే దానిని ఎవరికి అమ్మాడనేది మాత్రం నిందితుడు బయటపెట్టడం లేదు. దీనిని తేల్చడంపై పోలీసులు దృష్టిపెట్టారు. మిగతా 88 గ్రాముల కొకైన్‌ను పోలీసులు స్వాధీనం చేసుకున్నారు.
మరిన్ని సినిమా కథనాల కోసం క్లిక్‌ చేయండి.
