ప్రపంచవ్యాప్తంగా సినీప్రియులు ఎంతో ఆసక్తిగా ఎదురుచూస్తోన్న సినిమా ప్రాజెక్ట్ కె. అత్యంత ప్రతిష్టాత్మకంగా డైరెక్టర్ నాగ్ అశ్విన్ తెరకెక్కిస్తోన్న ఈ సినిమాలో పాన్ ఇండియా స్టార్ ప్రభాస్ ప్రధాన పాత్రలో నటిస్తున్నారు. అలాగే లోకనాయకుడు కమల్ హసన్, బాలీవుడ్ స్టార్ అమితాబ్ బచ్చన్ కీలకపాత్రలు పోషిస్తుండడంతో ఈ మూవీపై అంచనాలు ఓ రెంజ్లో ఏర్పడ్డాయి. అలాగే ఈ చిత్రంలో బాలీవుడ్ బ్యూటీస్ దీపికా పదుకొణె, దిశా పటానీ కథానాయికలుగా నటిస్తున్నారు. ముందు నుంచి ఈ సినిమాపై సస్పెన్స్ నెలకొన్న సంగతి తెలిసిందే. ఇప్పటికే విడుదలైన పోస్టర్స్ సినిమాపై క్యూరియాసిటిని పెంచాయి. ఈ క్రమంలోనే గత కొద్ది రోజులుగా ఈ మూవీపై ఇంట్రెస్టింగ్ బజ్ నెలకొంది. ఇప్పటికే ప్రమోషన్స్ షూరు చేసిన చిత్రయూనిట్.. ప్రతిష్టాత్మక శాండియాగో కామిక్ కాన్-2023 వేదికపై సినిమా టైటిల్, ప్రచార చిత్రాన్ని విడుదల చేయనుంది. ప్రస్తుతం ఈ సినిమా ప్రాజెక్ట్ కె అనే వర్కింగ్ టైటిల్ తో రూపొందుతుంది.
ఈనెల 20న అమెరికాలో జరిగే శాండియాగో కామిక్ కాగ్ వేడుకలలో ఈసినిమా టైటిల్ రివీల్ చేయనున్నారు మేకర్స్. ఈ క్రమంలో ప్రాజెక్ట్ కె టైటిల్ ఇదేనంటూ నెట్టింట ఓ పేరు చక్కర్లు కొడుతుంది. ఈ సినిమాకు కాలచక్ర అనే టైటిల్ ఫిక్స్ చేసినట్లుగా వార్తలు వినిపిస్తున్నాయి. రెండు కాలాల మధ్య జరిగే సన్నివేశాలతో రాబోతున్న ఈ చిత్రానికి కాలచక్ర అనే పేరు ఫిక్స్ చేసినట్లుగా టాక్ నడుస్తోంది.
కాలచక్ర కాకుండా కురుక్షేత్ర అనే టైటిల్ కూడా పెట్టవచ్చు అని అంటున్నారు సినీ ప్రముఖులు. మహాభారతం ఆధారంగా ఈ చిత్రాన్ని రూపొందించారని.. ఇందులో పురాణ కథకు సంబంధించిన సన్నివేశాలు ఉండనున్నాయని అంటున్నారు. మొత్తానికి ఈ సినిమా టైటిల్ పై క్లారిటీ రావాలంటే జూలై 20 వరకు వెయిట్ చేయాల్సిందే.
అలాగే ప్రాజెక్ట్ కె చిత్రాన్ని రెండు భాగాలుగా తెరకెక్కిస్తున్నారని.. వరల్డ్ వైడ్ గా సినీ ప్రియులను మెప్పించే స్థాయిలో ఈ సినిమా తెరకెక్కిస్తున్నారని టాక్ నడుస్తోంది. వైజయంతీ మూవీస్ బ్యానర్ పై నిర్మిస్తోన్న ఈసినిమాను వచ్చే ఏడాది జనవరి 12న రిలీజ్ చేయనున్నారు.
