ప్రస్తుతం ఇండియన్ బాక్సాఫీస్ వద్ద సౌత్ మూవీస్ సత్తా చాటుతున్నాయి. కేవలం పెద్ద సినిమాలే కాదు.. ఎలాంటి అంచనాలు లేకుండా వచ్చిన చిన్న చిత్రాలకు సైతం మంచి ఆదరణ లభిస్తోంది. అలాగే భాషతో సంబంధం లేకుండా బాక్సాఫీస్ వద్ద భారీగా వసుళ్లు రాబడుతున్నాయి. ఈ క్రమంలోనే బాలీవుడ్ స్టార్స్ దృష్టి దక్షిణాదిపై పడింది. హిందీ స్టార్స్ అందరూ ఇప్పుడు తెలుగు, తమిళ్ సినిమాల్లో నటించేందుకు తెగ ఇంట్రెస్ట్ చూపిస్తున్నారు. ఇప్పటికే స్టార్ హీరో సైఫ్ అలీ ఖాన్ ఆదిపురుష్ సినిమాతో తెలుగు తెరకు పరిచయం కాబోతున్నారు. మరోవైపు బాలీవుడ్ క్రేజీ బ్యూటీ జాన్వీ కపూర్ ఎన్టీఆర్ సరసన దేవర చిత్రంలో నటిస్తుంది. మరోవైపు వాల్తేరు వీరయ్య సినిమాలో సల్మాన్ ఖాన్ కీలకపాత్రలో నటించిన సంగతి తెలిసిందే. ఇక ఇప్పుడు మరో హీరో సౌత్ మూవీస్ చేయాలని ఉందని మనసులో మాట బయటపెట్టాడు.
బాలీవుడ్ హీరో షాహిద్ కపూర్ ప్రధాన పాత్రలో నటించిన బ్లడీ డాడీ సినిమా జూన్9న అడియన్స్ ముందుకు రానుంది. డైరెక్టర్ అలీ అబ్బాస్ జాఫర్ తెరకెక్కించిన ఈ సినిమా 2011లో వచ్చిన ఫ్రెంచ్ మూవీ స్లీప్ లెస్ నైట్ చిత్రానికి అడాప్షన్ గా తెరకెక్కుతుంది. ప్రముఖ ఓటీటీ జియో సినిమాలో ఈ చిత్రం రిలీజ్ కాబోతుంది. ఈ మూవీ ప్రమోషన్లలో భాగంగా ఓ ఇంటర్వ్యూలో పాల్గొన్న షాహిద్ కపూర్ సౌత్ మూవీస్ పై ఇంట్రెస్టింగ్ కామెంట్స్ చేశారు.
ఒకవేళ మీకు హాలీవుడ్ సినిమాల్లో నటించే ఛాన్స్ వస్తే చేస్తారా ? అని ప్రశ్నించగా.. షాహిద్ కపూర్ స్పందిస్తూ.. “హాలీవుడ్ సినిమాలో ఏదో ఒక చెత్త పాత్ర చేయడానికి అసలు ఇష్టం లేదు. ఆ చిత్రాల్లో నటించడానికి కంటే తమిళ్, తెలుగు, మలయాళ సినిమాల్లో నటించే అవకాశం వస్తే చేస్తాను. ఎందుకంటే ఆ సినిమాల్లో నటనకు ప్రాముఖ్యత ఇచ్చే పాత్రలు ఉంటాయి. నన్ను నేను నటుడిగా ఇంకొంచెం బెటర్ చేసుకునేందుకు ఆ సినిమాలు ఉపయోగపడతాయి.” అని అన్నారు.
