అలనాటి నటి రమాప్రభ ఎన్నో వందల సినిమాల్లో నటించి మెప్పించారు. వయసు మీద పడటంతో ఆమె సినిమాలకు దూరంగా ఉంటున్నారు. తాజాగా ఆమె తన పై వస్తున్న రూమర్స్ పై విచారం వ్యక్తం చేశారు. సినిమాలకు దూరం ఉన్నా.. తన సొంత యూట్యూబ్ ఛానెల్ ద్వారా అభిమానులకు దగ్గరగా ఉంటున్నారు రమాప్రభ. ప్రస్తుతం చెన్నైలో ఉంటున్న ఆమె తన కుటుంబంతో సంతోషంగా గడుపుతున్నారు. తాజాగా ఆమె మాట్లాడుతూ.. సినిమాలు గ్యాప్ ఇచ్చాను. దాదాపు మూడు నెలల నుంచి చిన్న టూర్ వెళ్ళొచ్చా.. హైదరాబాద్, విజయవాడ, తిరుపతి, షిరిడీ వెళ్లి వచ్చాను అని తెలిపారు. కొద్దిరోజులుగా తన పై వస్తున్న వార్తలు చూస్తుంటే ఒక్కోసారి జాలేస్తుంది.. ఒక్కోసారి నవ్వు వస్తుంది.. ఒక్కోసారి బాధగా ఉంటుంది అని తెలిపారు రమాప్రభ.
చెన్నైలో నాకు ఒక ఇల్లు ఉంది. నా ఇంట్లో చాలామంది ఉన్నారు. నాకు స్టార్ హీరోలు డబ్బు సాయం చేశారని వస్తున్న వార్తల్లో ఎలాంటి నిజం లేదని చెప్పారు ఆమె. సూపర్ స్టార్ రజినీకాంత్ రమాప్రభకు ఆర్ధిక సాయం చేశారు అంటూ వార్తలు వస్తున్నాయి.
నాకు ఎవ్వరూ సాయం చేయాల్సిన అవసరం లేదు. నేను 13 ఏళ్ల నుంచే సంపాదిస్తున్నా.. ఇప్పుడు నా గురించి నోటికొచ్చింది మాట్లాడుతూ మిగతావాళ్ళు సంపాదిస్తున్నారు అని అన్నారు. ఈ మధ్య ఏదో ఒకరకంగా పాపులర్‌ అవుతున్నా. ఒకటీ రెండు సంఘటనలు నా గురించే ఉన్నాయి. అందుకే మాట్లాడాల్సి వచ్చింది అని అన్నారు.
